Skráning ökutækis úr umferð

Við skráningu úr umferð er notkun ökutækis óheimil. Hægt er að skrá ökutæki úr umferð á tvo vegu, annars með því að leggja inn skráningarmerki þess og hins vegar með því að tilkynna það úr umferð og líma notkun bönnuð yfir skoðunarmiða.

Bann við notkun ökutækis miðast við móttöku beiðnar um skráningu úr umferð eða móttöku skráningarmerkja. Óheimilt er að skrá ökutæki úr umferð aftur í tímann nema gegn staðfestri kvittun, sambærilegri sönnun á móttöku tilkynningar um skráningu úr umferð eða skráningarmerkja þjónustuaðila.

• Ef af ökutæki er greitt kílómetragjald samkvæmt löggiltum ökumæli (þyngri bifreiðir og eftirvagnar ásamt bifreiðum skráðum til sérstakra nota) er nauðsynlegt að lesa af ökumæli við skráningu úr umferð og tilkynna álestur til Skattsins (sjá eyðublað Skattsins). Eigandi (umráðandi) skal upplýstur um þetta og ber ábyrgð á útfyllingu eyðublaðsins og á að koma því til Skattsins.

• Ef af ökutæki er greitt kílómetragjald samkvæmt akstursmæli (rafmagnsbílar, vetnisbílar og tengiltvinnbílar) má skila inn álestri akstursmælis og skrá stöðuna við innlögn (í vefþjónustunni). Sé það ekki gert þá heldur Skatturinn áfram að áætla mánaðarlega og rukka þótt ökutæki sé skráð úr umferð, alveg þar til staðan verður skráð inn (þá leiðréttist það sem áður hefur verið áætlað og álagning er stöðvuð þar til ökutækið verður skráð í umferð á ný).

Úr umferð með innlögn skráningarmerkja

Eigandi (umráðandi) ökutækis eða aðrir fyrir hönd þeirra (þarf ekki umboð) geta óskað eftir því að það verði tímabundið skráð úr umferð með því að skila inn skráningarmerkjum ökutækisins. Ef ökutæki ber tvö skráningarmerki skal skila þeim báðum inn.

• Ástæða skráningar úr umferð skal vera "Úr umferð (innlögn)". Ef innlögnin er vegna tjóns að ósk tryggingafélags, eða ef ökutæki er skráð tjónaökutæki, skal ástæðan vera "Úr umferð v/tjóns".

• Ekki er leyfilegt að leggja inn bara annað skráningarmerkið (á þeim ökutækjum sem eiga að hafa tvö), sjá þó næsta punkt. Sé bara öðru skilað inn er viðkomandi skylt að panta og greiða fyrir eitt nýtt skráningarmerki og má þá skrá innlögn (hið nýja merki er svo skráð í innlagnargeymslu þegar það kemur úr framleiðslu). Hafi ökutækið skráningarmerki af eldri gerð, og bara öðru skilað inn, er þessu eina fargað og viðkomandi skylt að panta tvö ný skráningarmerki sem skulu ekki skráð í innlögn fyrr en þau koma úr framleiðslu. Tryggingafélagi (eða aðila fyrir hönd þess) er þó heimilt að

• Heimilt að skrá úr umferð þrátt fyrir að aðeins öðru skráningarmerkinu hafi verið skilað inn af tryggingafélagi (og lögreglu, sjá neðar). Í slíkum tilvikum þarf eigandi (umráðandi) að panta nýja plötu og hún þarf að vera móttekin hjá afhendingaraðila áður en hægt að skrá ökutækið í umferð á ný.

• Á kvittun sem þjónustuaðili afhendir við móttöku merkja skal koma fram athugasemd um að merkjunum verði fargað eftir eitt ár í geymslu.

Úr umferð með álímingu akstursbannsmiða

Eigandi (umráðandi) ökutækis getur óskað eftir því að það verði tímabundið skráð úr umferð með því að framvísa tilkynningu (US.159) um skráningu úr umferð með miða (aðrir þurfa umboð).

• Ástæða skráningar úr umferð skal vera "Úr umferð (miði)". Ef ökutæki er skráð tjónaökutæki skal ástæðan vera "Úr umferð v/tjóns".

• Eigandi (umráðandi) fær afhentan miða með áletruninni "Notkun bönnuð" við afgreiðslu tilkynningar. Honum ber að líma hann yfir skoðunarmiða á skráningarmerki. Ef ökutæki ber eldri gerð skráningarmerkja skal er miðinn settur í framrúðu ökutækisins í stað skoðunarmiða. Minnt skal á að bann við notkun ökutækis miðast við móttöku tilkynningar, óháð því hvenær miði er límdur á skráningarmerki eða rúðu ökutækis.

• Úr umferð með miða verður til þess að ekki eru lögð vanrækslugjöld á ökutækið, hafi það ekki verið skoðað á tilsettum tíma. Ökutækið skal þá skoða við skráningu í umferð.

• Hafa skal í huga þegar ökutæki er skráð úr umferð með miða að ekki er öruggt að tryggingar falli niður líkt og þegar skráningarmerki eru lögð inn.

• Minnt er á að lögreglu heimilt að fjarlægja skráningarmerki af ökutækjum sem skráð eru úr umferð með miða sem standa á lóðum við almannafæri, á götum og í almennum bifreiðastæðum. Í þeim tilvikum er eins ástatt og um ökutæki sem er án skráningarmerkja.

Úr umferð eftir afklippingu lögreglu

Lögregla getur fjarlægt skráningarmerki af ökutæki ef tiltekin skilyrði eru fyrir hendi. Lögreglan skilar skráningarmerkjum til þjónustuaðila ásamt upplýsingum um ástæðu afklippingar og er ástæðan skráð í ökutækjaskrá um leið og ökutæki er skráð úr umferð.

• Ástæða skráningar úr umferð skal vera sú afklippingarástæða sem tilgreind er af lögreglu (sjá yfirlit yfir ástæðurnar "Afklippt vegna ..." í úttekt merkja eftir afklippingu).

• Ef ástæður afklippingar eru fleiri en ein skal skrá þá ástæðu sem gerir mestar kröfur við skráningu í umferð (yfirleitt er það vegna skoðunar).

• Þó gildir að ef klippt var af vegna tjóns, jafnvel þótt aðrar ástæður séu tilgreindar, skal skrá ökutækið "Úr umferð v/tjóns" (og minna á að lögregla þurfi að skila inn tilkynningu um tjónaökutæki, annað hvort á pappír með merkjunum eða með tölvupósti til Samgöngustofu). Hafi ökutæki þegar verið skráð úr umferð vegna tjóns og skráningarmerki sögð í vörslu lögreglu þarf bara að breyta geymslustað þeirra.

• Skili lögregla inn plötu/plötur sem klipptar hafa verið af ökutæki sem þegar hefur verið skráð úr umferð skal ógilda umferðarskráninguna með því að skrá ökutækið í umferð sama dag og það var tekið úr umferð. Ökutækið er svo skráð úr umferð frá því að afklippta platan/plöturnar berast.

• Heimilt að skrá úr umferð þrátt fyrir að aðeins öðru skráningarmerkinu hafi verið skilað inn af lögreglu. Í slíkum tilvikum þarf eigandi (umráðandi) að panta nýja plötu og hún þarf að vera móttekin hjá afhendingaraðila áður en hægt að skrá ökutækið í umferð á ný.

Gjaldtaka

• Gjald Samgöngustofu vegna skráningar úr umferð er 1.114 krónur.

• Samgöngustofa innheimtir ekki gjald fyrir skráningu úr umferð ef skráningarmerki voru afklippt af lögreglu eða ef ökutæki var skráð úr umferð vegna tjóns.

Tölvuvinnsla

Þjónustuaðilar skrá sjálfir ökutæki úr umferð í gegnum vefþjónustu skv. ofangreindum reglum.

Skráning ökutækis í umferð

Eigandi (umráðandi) ökutækis sem skráð hefur verið tímabundið úr umferð getur óskað eftir því að það verði skráð í umferð á ný (eða annar aðili samkvæmt umboði, sjá neðar).

Óheimilt er að nota ökutæki sem hefur verið skráð úr umferð fyrr en það er skráð í umferð að nýju og skráningarmerki hafa verið sett aftur á það eða réttur skoðunarmiði. Skoðunarmiði skal vera í samræmi við gilda skoðun ökutækisins.

• Dagsetning skráningar í umferð miðast við móttökudag beiðnar um skráningu í umferð hjá þjónustuaðila séu öll skilyrði skráningar uppfyllt.

• Liggja þarf fyrir staðfesting á vátryggingu ökutækisins. Nægilegt er að það komi fram í ökutækjaskrá að ökutæki sé tryggt en annars þarf að framvísa sérstakri staðfestingu frá tryggingafélagi.

• Ganga þarf úr skugga um að reglubundin skoðun sé í gildi (að ekki sé komið fram yfir frest til að mæta í næstu aðalskoðun eða til endurskoðunar) og að skráningarmerki beri skoðunarmiða í samræmi við síðustu skoðun. Athugið þó heimild til að veita akstursheimild í næsta lið. Áréttað er að óheimilt er að skrá ökutæki í umferð, afhenda eða setja innlögð skráningarmerki á ökutæki, ef niðurstaða síðustu skoðunar er "notkun bönnuð".

• Hafi ökutæki ekki gilda aðalskoðun er heimilt að veita viku frest til að færa það til skoðunar. Þetta er þó ekki heimilt ef skráningarmerki voru afklippt vegna vanbúnaðar eða skoðunar. Þegar veittur er frestur til skoðunar skal eigandi/umráðamaður undirrita yfirlýsingu um að hann telji ökutækið í lögmætu ástandi og hæft til skoðunar og að það verði fært til skoðunar innan viku. Starfsmaður þjónustuaðila staðfestir akstursheimildina með dagsetningu, undirritun og stimpli og skráir í ökutækjaskrá (dagbók) að akstursheimild hafi verið gefin út. Akstursheimildin skal ávallt vera sýnileg í ökutækinu (í glugga).

• Ef af ökutæki er greitt kílómetragjald samkvæmt löggiltum ökumæli (þyngri bifreiðir og eftirvagnar ásamt bifreiðum skráðum til sérstakra nota) er nauðsynlegt að lesa af ökumæli við skráningu í umferð og tilkynna álestur til Skattsins (sjá eyðublað Skattsins), hafi það ekki verið gert við skráningu úr umferð. Eigandi (umráðandi) skal upplýstur um þetta og ber ábyrgð á útfyllingu eyðublaðsins og á að koma því til Skattsins.

• Ef af ökutæki er greitt kílómetragjald samkvæmt akstursmæli (rafmagnsbílar, vetnisbílar og tengiltvinnbílar) er æskilegt að skila inn álestri akstursmælis hafi það ekki verið gert við skráningu úr umferð (enda hefur Skatturinn þá haldið áfram að áætla mánaðarlega og rukka á meðan ökutækið var úr umferð). Sé staðan ekki sett inn er æskilegt að benda viðskiptavini á að hann ætti nú að senda inn stöðuna sjálfur svo álagning verði sem réttust.

Í umboði skal koma fram efni umboðs, fastanúmer ökutækis, nafn og kennitala umboðsmanns, undirritun umbjóðanda, tveir vitundarvottar, staður og dagsetning. Umbjóðandi, umboðsmaður og vitundarvottar skulu allir að vera orðnir 18 ára.

Í umferð með úttekt skráningarmerkja

Hafi skráningarmerki verið lögð inn (skráð úr umferð með innlögn skráningarmerkja) þá getur eigandi (umráðandi) óskað eftir úttekt skráningarmerkja hjá þjónustuaðila.

• Ástæða skráningar í umferð skal vera "Í umferð (úttekt)".

• Að lokinni skráningu ökutækis í umferð skal afhenda skráningarmerki ökutækisins.

• Berist beiðni um skráningu í umferð með pósti skal bjóðast til að senda eiganda (umráðanda) skráningarmerki ökutækis á hans kostnað.

• Ef ástæða skráningar úr umferð var "Úr umferð v/tjóns") hefur ökutæki lent í tjóni sem laga þarf með viðurkenndum hætti. Slík ökutæki eru skráð sem tjónaökutæki. Úrbætur felast í því að færa ökutækið til viðgerðar á viðurkenndu réttingaverkstæði sem tilkynnir viðgerðarlok til Samgöngustofu sem ógildir tjónaskráninguna (sjást verður í ferli að það hafi verið gert). Svo verður að færa ökutækið til reglubundinnar skoðunar hjá skoðunarstofu. Hér gilda þau skilyrði að ekki má afhenda skráningarmerki nema niðurstaða skoðunarinnar sé önnur en "Akstursbann". Sjá einnig um endurmat tjónaökutækja.

Í umferð með endurnýjun skoðunarmiða

Hafi ökutæki verið skráð úr umferð með miða þá getur eigandi (umráðandi) framvísað umsókn um skráningu í umferð með miða (US.160) hjá þjónustuaðila og skal hún vera undirrituð af eiganda, meðeiganda eða umráðanda ökutækis. Ef aðrir en ofangreindir aðilar undirrita skal umboð fylgja með. Einnig er hægt að tilkynna um skráningu ökutækis í umferð með miða rafrænt á heimasíðu Samgöngustofu.

• Ástæða skráningar í umferð skal vera "Í umferð (miði)".

• Að lokinni skráningu ökutækis í umferð skal afhenda skoðunarmiða sem er í samræmi við skoðun ökutækisins.

• Berist umsókn um skráningu í umferð með öðrum hætti (pósti, tölvupósti, síma) skal bjóðast til að senda eiganda (umráðanda) nýjan skoðunarmiða á hans kostnað.

• Hafi ný skráningarmerki verið pöntuð á ökutæki sem er skráð úr umferð og með skráningarmerki í geymslu má ekki afhenda nýju merkin nema ökutækið sé um leið skráð í umferð. Gömlu merkjunum skal fargað.

Í umferð eftir afklippingu

Hafi skráningarmerki verið fjarlægð af lögreglu gilda strangari skilyrði um úttekt skráningarmerkja en ella. Hafi bara annað skráningarmerki ökutækis verið fjarlægt (hitt var ekki til staðar) er óheimilt að framkvæma úttekt fyrr en hitt hefur verið pantað og móttekið hjá afgreiðsluaðila.

• Ástæða skráningar í umferð skal vera "Í umferð (úttekt)".

• Ef klippt var af vegna skoðunar hefur ökutækið ekki verið fært til skoðunar þegar krafist er. Úrbætur felast í því að færa ökutækið til skoðunar. Hér gilda þau ströngu skilyrði að ökutækið þarf að öðlast gilda skoðun til að heimilt sé að afhenda skráningarmerki á ný, þ.e. með niðurstöðunni "Án athugasemda" eða "Lagfæring". Óheimilt er að veita akstursheimild í þessu tilviki.

• Ef klippt var af vegna endurskoðunar er ökutæki komið fram yfir á fresti til endurskoðunar. Úrbætur felast í því að færa ökutækið til skoðunar. Hér gilda þau ströngu skilyrði að ökutækið þarf að öðlast gilda skoðun til að heimilt sé að afhenda skráningarmerki á ný, þ.e. með niðurstöðunni "Án athugasemda" eða "Lagfæring". Óheimilt er að veita akstursheimild í þessu tilviki.

• Ef klippt var af vegna vanbúnaðar hefur komið í ljós við umferðareftirlit lögreglu að ökutækið er vanbúið og telst hættulegt. Úrbætur felast í því að bæta úr ágöllum og færa ökutækið til skoðunar. Hér gilda þau ströngu skilyrði að ökutækið þarf að öðlast gilda skoðun til að heimilt sé að afhenda skráningarmerki á ný, þ.e. með niðurstöðunni "Án athugasemda" eða "Lagfæring". Óheimilt er að veita akstursheimild í þessu tilviki.

• Ef klippt var af ökutæki vegna gjalda hafa ekki verið greidd álögð gjöld af ökutækinu. Úrbætur felast í því að greiða gjöldin.

• Ef klippt var af ökutæki vegna trygginga er fullnægjandi vátrygging ekki fyrir hendi. Úrbætur felast í því að láta vátryggja ökutækið.

• Ef klippt var af ökutæki vegna þess að það var skráð úr umferð, þá hefur ökutækið verið í notkun þrátt fyrir að vera skráð úr umferð eða afskráð í ökutækja­skrá (reiknað með að ökutækið hafi verið stöðvað og þetta komið í ljós - því getur líka hafa verið lagt á lóðum við almannafæri, á götum og í almennum bifreiðastæðum). Úrbætur felast í því að skrá ökutækið í umferð (afskráð ökutæki fást þó almennt ekki endurskráð á ný, skráningarmerkjum þeirra ber því að farga og skrá það í dagbók).

• Ef klippt var af vegna eigendaskipta hefur verið vanrækt að tilkynna eigendaskipti að öku­tæki. Úrbætur felast í því að tilkynna eigendaskipti (þó getur skráður eigandi alltaf gefið öðrum aðila umboð til númeraúttektar, sé um einhvern misskilning að ræða).

• Ef klippt var af vegna þess að einkamerki var útrunnið hefur réttur til einkamerkja ekki verið endurnýj­aður og búið er að fella hann niður. Úrbætur felast í því að annað hvort að endurnýja réttinn til einkamerkja eða skipta yfir á almenn merki (athuga að einka­merki fást ekki afhent á ný nema rétturinn sé endurnýjaður).

• Ef klippt var af vegna tjóns (skráð "Úr umferð v/tjóns") hefur ökutæki lent í tjóni sem laga þarf með viðurkenndum hætti. Slík ökutæki eru skráð sem tjónaökutæki. Úrbætur felast í því að færa ökutækið til viðgerðar á viðurkenndu réttingaverkstæði sem tilkynnir viðgerðarlok til Samgöngustofu sem ógildir tjónaskráninguna (sjást verður í ferli að það hafi verið gert). Svo verður að færa ökutækið til reglubundinnar skoðunar hjá skoðunarstofu. Hér gilda þau skilyrði að ekki má afhenda skráningarmerki nema niðurstaða skoðunarinnar sé önnur en "Akstursbann". Sjá einnig um endurmat tjónaökutækja.

Gjaldtaka

• Samgöngustofa innheimtir ekki gjald fyrir skráningu ökutækis í umferð.

Tölvuvinnsla

Þjónustuaðilar skrá sjálfir ökutæki í umferð í gegnum vefþjónustur að uppfylltum ofangreindum reglum.