Sjálfsvígsforvarnir

Nafnið Lífsbrú er myndlíking. Það vísar til vitundarvakningar á breiðum grunni um mikilvægi uppbyggilegs og heilbrigðs lífs, allt frá frumbernsku. Nafnið Lífsbrú leggur einnig huglæga brú yfir til þeirra sem haldnir eru sjálfsvígshugsunum eða við það að gefast upp, þannig að viðkomandi einstaklingar staldri við og sjái fyrir sér mögulega leið út úr ógöngunum.

Í kennimerkinu er notað tímalaust myndmál. Semikomman stendur fyrir það að saga einstaklings er ekki lokið, það er alltaf framhald á eftir semikommu. Brúin er tákn fyrir leið yfir erfiðleika. Saman mynda táknin sterka og vonríka ásýnd. Guli liturinn táknar ljós og von, auk þess sem hann er á heimsvísu gjarnan tengdur sjálfsvígsforvörnum meðan blái liturinn stendur fyrir traust og stöðugleika. Hugmyndin er að merkið vísi í ljós í myrkri, bjóði upp á stuðning og sýni að við erum öll saman í þessu, aldrei ein.

Nafn og kennimerki Lífsbrúar er komið frá Efli – Almannatengslum.

Í stjórn Lífsbrúar - miðstöðvar sjálfsvígsforvarna eru:

• Landlæknir

• Dóra Guðrún Guðmundsdóttir, sviðsstjóri lýðheilsusviðs hjá embætti landlæknis

• Guðrún Jóna Guðlaugsdóttir, verkefnastjóri sjálfsvígsforvarna hjá embætti landlæknis

• Högni Óskarsson, geðlæknir og ráðgjafi landlæknis í sjálfsvígsforvörnum

Hlutverk fagráðs um sjálfsvígsforvarnir er að vera landlækni til ráðgjafar í málefnum sem snerta sjálfsvígsforvarnir og stuðning við eftirlifendur.

Ráðið er þannig skipað:

• Guðrún Jóna Guðlaugsdóttir, verkefnisstjóri sjálfsvígsforvarna hjá embætti landlæknis

• Hans Guðberg Alfreðsson, prestur og prófastur, fyrir hönd Þjóðkirkjunnar

• Sigrún Sigurðardóttir, prófessor við heilbrigðisvísindasvið Háskólans á Akureyri, fyrir hönd Geðhjálpar

• Tómas Kristjánsson, sálfræðingur, lektor við sálfræðideild Háskóla Íslands

• Wilhelm Norðfjörð, sálfræðingur og rithöfundur

• Þórgunnur Ársælsdóttir, yfirlæknir bráða- og ráðgjafarþjónustu geðsviðs Landspítala

Skipunartími er til ársloka 2026

Litla gula peysan er hönnuð af Eddu Lilju Guðmundsdóttur. Hún hannaði peysuna í tilefni af Gulum september og gaf Lífsbrú uppskriftina til styrktar sjálfsvígsforvörnum.

Samfélag prjónafólks á Íslandi er stórt og löng hefð fyrir prjónaskap. Í prjónaskap felst núvitund sem getur verið hjálpleg fyrir geðheilsu. Það er von þeirra sem standa að baki Litlu gulu peysunni að til verði hópur fólks sem prjóni eftir uppskrift Eddu Lilju, ýmist einir eða taki þátt í skipulögðu samprjóni. Litla gula peysan myndi þannig tengja saman prjónafólk og afraksturinn yrði svo færður Lífsbrú að gjöf. Lífsbrú myndi í framhaldinu selja Litlu gulu peysuna áfram til fjáröflunar fyrir Gulan september og aðrar sjálfsvígsforvarnaraðgerðir. Á þennan hátt nýtist styrkur og samvinna prjónafólks málaflokknum en verður vonandi líka til þess að tengja saman fólk og skapa góðar prjónasamverustundir.

Þeir sem ekki geta prjónað en vilja styðja Lífsbrú – miðstöð sjálfsvígsforvarna er bent á að styðja má sjóðinn Lífsbrú með því að leggja inn á eftirfarandi reikning:

• Kennitala: 501023-0780

• Reikningsnúmer: 0370-26-047094
  

• Sjálfsvígsforvarnir. Ársskýrsla 2024

• Sjálfsvígsforvarnir. Ársskýrsla 2023