Sjálfsvígsforvarnir

Embætti landlæknis ber ábyrgð á sjálfsvígsforvörnum á Íslandi og er faglegur ráðgjafi stjórnvalda á því sviði. Haldið er utan um sjálfsvígsforvarnirnar hjá Lífsbrú – miðstöð sjálfsvígsforvarna og unnið er eftir samþykktri gildandi aðgerðaáætlun til að fækka sjálfsvígum á Íslandi.

Lífsbrú - miðstöð sjálfsvígsforvarna

Lífsbrú - miðstöð sjálfsvígsforvarna, sem starfar undir merkjum embættis landlæknis, er faglegur ráðgjafi stjórnvalda á sviði sjálfsvígsforvarna í samvinnu við fagráð um sjálfsvígsforvarnir. Með Lífsbrú er stuðlað að samvinnu meðal þeirra sem vinna að málaflokknum innan og utanlands. Á vegum Lífsbúar - miðstöðvar sjálfsvígsforvarna er fylgst með rannsóknum, unnið að gerð fræðsluefnis fyrir almenning og fagfólk og stuðlað að vitundarvakningu um málaflokkinn.

Tölfræði

Sjálfsvíg eru fremur fátíð miðað við stærstu flokka dánarorsaka. Síðastliðinn áratug hefur árlegur fjöldi sjálfsvíga á Íslandi verið á bilinu 34–49. Sjá nánar tölfræði um sjálfsvíg.

Sjálfsvíg eru að jafnaði tíðari meðal karla en kvenna, á meðan tíðni sjálfsvígstilrauna er hærri meðal kvenna og yngri aldurshópa. Sjálfsskaði og sjálfsvígstilraun er hins vegar þekktur áhættuþáttur sjálfsvíga, sem ýtir undir mikilvægi þess að einstaklingar fái góðan stuðning, eftirfylgd og viðeigandi meðferð í kjölfar sjálfsvígstilraunar.