Stafrænt Ísland
Hvað þarf stofnun að gera?
Hvað þarf stofnun að gera?
Stofnun hefur stafræna vegferð sína með því að sækja um samstarf. Stafrænt Ísland móttekur umsóknina og leggur mat á hvort að stofnun geti með einföldum hætti sett upp og innleitt starfræna umsókn. Í þeim tilfellum sitja fulltrúar stofnunar stutt námskeið í greiningu og smíði umsókna, fá aðgang að verkfærinu og handleiðslu við framleiðslu fyrstu umsóknanna.
Ef vörustjóri (Ísland.is) metur það sem svo að mynda þurfi teymi við uppsetningu umsóknarinnar er boðað til greiningarfundar og í kjölfarið unnið eftir hugbúnaðarferlum Stafræns Íslands við framleiðslu umsóknarinnar.
Stafrænt Ísland leggur áherslu á heildstæða nálgun á alla greiningarvinnu. Til að færa umsókn inn í umsóknarkerfi Ísland.is er þjónustan skoðuð, tilgangur ferlisins, aðgengi að gögnum og hvort einfalda megi og útskýra flæðið fyrir notandanum.
Ávinningur stofnana felst í
einfaldari stafrænum þjónustuferlum
betur upplýstum notendum gegnum Ísland.is
meiri sjálfvirknivæðingu í þjónustu
rýmri tíma til að sinna flóknari þjónustu
Ábyrgð og eignarhald á þjónustu sem færð er yfir í umsóknarkerfið er áfram hjá stofnuninni. Við innleiðinguna eru sett upp samskipti milli innra kerfis stofnunarinnar, þar sem vinnsla erindisins eiga sér stað, og viðmótsins á Ísland.is.
Ferlið skref fyrir skref
Stofnun framkvæmir frumgreiningu á hvaða umsóknarferli hafa mest vægi fyrir stofnunina og notendur.
Stofnun undirbýr verkefnatillögu (vörustjóri hjá Stafrænu Íslandi getur verið þar innan handar) og sendir inn í gegnum samstarfsumsókn.
Stafrænt Ísland tekur verkefnið til umfjöllunar.
Ef verkefnið er samþykkt er myndaður verkefnahópur með fulltrúa og teymi frá Stafrænu Íslandi ásamt eiganda ferlis og sérfræðingum hjá stofnuninni.
Ferlið er þá tekið inn í hönnunarsprett þar sem ferlið er krufið, gagnavinnslan kortlögð og frumgerð (e. prototype) kynnt fyrir hópnum.
Umsóknin er síðan sett upp í umsóknarkerfinu og gefin út á Ísland.is.
Kynningar- og markaðsefni undirbúið og opnað fyrir umsóknir.
