Lífsbrú - miðstöð sjálfsvígsforvarna

Sjóðurinn Lífsbrú

Sjóðurinn Lífsbrú var stofnaður af embætti landlæknis í október 2023. Honum er ætlað að byggja undir og styðja við sjálfsvígsforvarnir á Íslandi í gegnum Lífsbrú – miðstöð sjálfsvígsforvarna. Sjóðurinn starfar samkvæmt lögum um sjóði og stofnanir sem starfa samkvæmt staðfestri skipulagsskrá.

Nánari upplýsingar um sjóðinn Lífsbrú: lifsbru@landlaeknir.is

Markmið sjóðsins er að vinna að sjálfsvígsforvörnum í samræmi við samþykkta aðgerðaráætlun til að fækka sjálfsvígum á Íslandi. Þetta verður gert með því að styðja við verkefni sem fela í sér val, þróun og innleiðingu á fræðsluefni, verklagi og leiðbeiningum til að nota á öllum stigum forvarna. Markmiðum verður einnig náð með því að byggja undir verkefni sem miða að endurskoðun verkferla, vitundarvakningu og símenntun.

Markmiðum verður náð fram með markvissri fjáröflun til sjálfsvígsforvarna.

Litla gula peysan. Prjónauppskrift

Litla gula peysan er hönnuð af Eddu Lilju Guðmundsdóttur. Hún hannaði peysuna í tilefni af Gulum september og gaf Lífsbrú uppskriftina til styrktar sjálfsvígsforvörnum.

Samfélag prjónafólks á Íslandi er stórt og löng hefð fyrir prjónaskap. Í prjónaskap felst núvitund sem getur verið hjálpleg fyrir geðheilsu. Það er von þeirra sem standa að baki Litlu gulu peysunni að til verði hópur fólks sem prjóni eftir uppskrift Eddu Lilju, ýmist einir eða taki þátt í skipulögðu samprjóni. Litla gula peysan myndi þannig tengja saman prjónafólk og afraksturinn yrði svo færður Lífsbrú að gjöf. Lífsbrú myndi í framhaldinu selja Litlu gulu peysuna áfram til fjáröflunar fyrir Gulan september og aðrar sjálfsvígsforvarnaraðgerðir. Á þennan hátt nýtist styrkur og samvinna prjónafólks málaflokknum en verður vonandi líka til þess að tengja saman fólk og skapa góðar prjónasamverustundir.

Þeir sem ekki geta prjónað en vilja styðja Lífsbrú – miðstöð sjálfsvígsforvarna er bent á að styðja má sjóðinn Lífsbrú með því að leggja inn á eftirfarandi reikning:

Kennitala: 501023-0780
Reikningsnúmer: 0370-26-047094

Nafnið Lífsbrú er myndlíking. Það vísar til vitundarvakningar á breiðum grunni um mikilvægi uppbyggilegs og heilbrigðs lífs, allt frá frumbernsku. Nafnið Lífsbrú leggur einnig huglæga brú yfir til þeirra sem haldnir eru sjálfsvígshugsunum eða við það að gefast upp, þannig að viðkomandi einstaklingar staldri við og sjái fyrir sér mögulega leið út úr ógöngunum.

Í kennimerkinu er notað tímalaust myndmál. Semikomman stendur fyrir það að saga einstaklings er ekki lokið, það er alltaf framhald á eftir semkommu. Brúin er tákn fyrir leið yfir erfiðleika. Saman mynda táknin sterka og vonríka ásýnd. Guli liturinn táknar ljós og von, auk þess sem hann er á heimsvísu gjarnan tengdur sjálfsvígsforvörnum meðan blái liturinn stendur fyrir traust og stöðugleika. Hugmyndin er að merkið vísi í ljós í myrkri, bjóði upp á stuðning og sýni að við erum öll saman í þessu, aldrei ein.

Nafn og kennimerki Lífsbrúar er komið frá Efli – Almannatengslum.