Endurhæfing - leiðbeiningar fyrir fagfólk

Endurhæfingaráætlun skal ávallt taka mið af heilsufarsvanda sem veldur óvinnufærni. Leita skal leiða til að bæta heilsu, efla starfshæfni eða auka atvinnuþátttöku.

Endurhæfingaráætlun þarf að vinna í samstarfi við einstaklinginn.

Til þess þarf að:

• byggja á heildstæðri nálgun

• greina vandann sem veldur óvinnufærni

• ákveða langtíma- og skammtíma markmið

• greina úrræði sem einstaklingur þarf að sinna

• leita leiða til að hefja endurhæfingu sem fyrst

• setja tímaramma fyrir fyrirhugaða endurkomu á vinnumarkað að hluta eða fullu

Mikilvægt er að aukin starfshæfni sé alltaf höfð að leiðarljósi í endurhæfingu og endurhæfingaráætlun leggi áherslu á endurkomu á vinnumarkað.

Einstaklingur og umsjónaraðili skrifa báðir undir endurhæfingaráætlunina. Í þeim tilvikum sem umsækjandi hefur ekki tök á að undirrita áætlun er heimilt að skila umsókn um endurhæfingarlífeyri í gegnum Mínar síður TR og er þá umsóknin ígildi undirritunar.

Innihald endurhæfingaráætlunar

Endurhæfingaáætlun getur komið fram í læknisvottorði eða á eyðublaði frá TR.

Í endurhæfingaráætlun þurfa að koma fram:

• upplýsingar um langtíma- og skammtímamarkmið

• greinargóð lýsing á innihaldi endurhæfingar

• tímabil endurhæfingar

• upplýsingar um áætlaða endurkomu á vinnumarkað að hluta eða að fullu

• fyrri endurhæfing ef við á

Með greinargóðri lýsingu er átt við upplýsingar um:

• endurhæfingarúrræði og hjá hvaða fagaðilum umsækjandi mun sækja þau á tímabilinu

• hvernig tekið er á andlegum, líkamlegum og félagslegum þáttum

• hvernig úrræðum er ætlað að bæta heilsu og auka atvinnuþátttöku

• hve oft í viku eða mánuði úrræðið er stundað. Það er ekki nóg að skrifa að úrræði verði stunduð „reglulega“ eða stefnt sé að þátttöku.

Gert er ráð fyrir stíganda í endurhæfingu.

Vinna og nám sem hluti af endurhæfingu

Nám og hlutastarf geta verið hluti af endurhæfingu en má ekki koma í veg fyrir að hægt sé að sinna úrræðum sem taka á þeim heilsufarsvanda sem veldur óvinnufærni.

Ef nám eða vinna er hluti af endurhæfingu þarf að fylgja með umsókn:

• staðfesting á einingafjölda frá skóla

• staðfesting um starfshlutfall frá vinnuveitanda

Tímabil endurhæfingar

Tímabil í endurhæfingaráætlun ákvarðar oftast greiðslur endurhæfingarlífeyris. Í einhverjum tilvikum er greiðslutímabilið styttra en sótt er um, til dæmis ef:

• endurhæfingaráætlun er óljós

• ósamræmi er í upplýsingum um úrræði og tímabil

Almennt er sótt um 6 mánuði í einu og framlengt eftir þörfum.

Ný endurhæfingaráætlun þarf að fylgja hverri framlengingu.

Hámarkslengd endurhæfingarlífeyris eru 5 ár, eða 60 mánuðir.