Miðstöð menntunar og skólaþjónustu
Úrslit Ljóðaflóðs
28. janúar 2025
Vinátta og sterkar tilfinningar voru áberandi í ljóðum grunnskólanema í ljóðasamkeppninni Ljóðaflóði sem við stóðum fyrir í tilefni af degi íslenskrar tungu. Nemendur sömdu líka ljóð um náttúruna, skólann, jólin, drauga, ofbeldi, frið o.fl. Alls bárust 128 ljóð frá 17 skólum víðs vegar að af landinu, 68 ljóð frá unglingastigi, 39 frá miðstigi og 21 ljóð frá yngsta stigi.
Dómnefnd valdi eitt verðlaunaljóð á hverju stigi og fengu vinningshafar bókaverðlaun og viðurkenningarskjal. Auk þess gefst nemendum tækifæri til að flytja verðlaunaljóð sín á KrakkaRÚV. Vinningshafarnir eru:
Þóra Egilsdóttir, nemandi í 4. bekk Grunnskóla Fjallabyggðar, fyrirljóðið Vinir. Í umsögn dómnefndar segir: Í þessu fallega og hnitmiðaða ljóði koma fram einföld og skýr skilaboð um vináttu. Skemmtileg notkun á rími og síðustu tvær ljóðlínurnar ramma inn merkingu ljóðsins á áhrifamikinn hátt.
Önnur ljóð sem voru á meðal þeirra bestu á yngsta stigi má sjá hér.
Brynhildur Eyja Jóhannesdóttir, nemandi í 5. bekk Grunnskóla Borgarfjarðar, fyrir ljóðið Tilfinningaklessa. Í umsögn dómnefndar segir: Skemmtilegt ljóð sem lýsir tilfinningaróti á beinskeittan hátt. Flottur stígandi er í ljóðinu og rímorðin gefa því húmorískan blæ.
Önnur ljóð sem voru á meðal þeirra bestu á miðstigi má sjá hér. Einnig fengum við sent skemmtilegt rapp við eitt ljóðið sem heyra má hér í flutningi Sævars Hjalta Þorsteinssonar.
Inda Marý Kristjánsdóttir, nemandi í 10. Bekk Barnaskóla Vestmannaeyja, fyrir ljóð sitt Þú grætur ekki eins og ég. Í umsögn dómnefndar segir: Tilfinningaþrungi og einlægni koma vel fram í þessu fallega ljóði ásamt áhrifamiklu myndmáli.
Önnur ljóð sem voru á meðal þeirra bestu á unglingastigi má sjá hér.
Verðlaunaljóð í ljóðasamkeppni grunnskólanema, Ljóðaflóði 2024:
Vinir
Vinur er góður
en ekki óður.
Vinur er blíður
og líka svo fríður.
Góður vinur er vinur,
sama hvað á dynur.
Þóra Egilsdóttir, verðlaunahafi á yngsta stigi
Tilfinningaklessa
Gleði, reiði, kvíði og spenna
það stundum gerist að þau saman renna.
Þá inni í þér fer allt í klessu
og svo breytist þú í skessu.
Þú kastar dóti í mömmu
og öskrar á ömmu.
Ferð í fýlu út í pabba
bara fyrir að labba.
Svo ferðu inn í herbergi
og kýlir vegg úr bergi.
Þegar þú ert búin að vera þar lengi
og búin að hringja í þitt eigið gengi.
Þá ferðu fram
biðst fyrirgefningar og færð smá skamm.
Þá líður þér samt vel
þú ert nú ekki í hel.
Brynhildur Eyja Jóhannesdóttir, verðlaunahafi á miðstigi
Þú grætur ekki eins og ég
þegar tunglið lýsir upp næturhimininn
og sólin er löngu búin að fela sig
geri ég mig tilbúna í háttinn
og breiði sængina mína yfir mig
um leið skríða minningarnar um okkur út um augun á mér og leka niður kinnar mínar
ég minni mig þá á að þú grætur ekki yfir þeim þótt að þetta séu líka minningarnar þínar
Inda Marý Kristjánsdóttir, verðlaunahafi á unglingastigi
Miðstöð menntunar óskar vinningshöfum hjartanlega til hamingju með frábæran árangur og þakkar grunnskólanemum og kennurum fyrir þátttökuna. Við vonum að ljóðasamkeppnin Ljóðaflóð muni hvetja nemendur til að virkja sköpunarmátt sinn og semja ljóð um allt það sem brennur á þeim hverju sinni.