Miðstöð menntunar og skólaþjónustu
Námskeið um Menningarmót og fjölbreytt tungumál í skóla- og frístundastarfi fyrir kennara, stjórnendur og starfsfólk
23. janúar 2025
Á hverjum degi ganga börn og ungmenni út um dyrnar heima hjá sér með tungumál í hjartanu, heilanum og í farteskinu. Tungumál eru samofin menningu einstaklinga og geyma tilfinningar, minningar og visku um allt milli himis og jarðar. Hvernig nýtum við þessa tungumála- og menningarauðlind í íslensku skóla- og frístundastarfi? Hvernig opnum við gluggann að íslensku samfélagi og um leið að heiminum sem umkringir okkur, gegnum reynsluheim og tungumál barna og ungs fólks?
Í tengslum við MEMM verkefnið býður Miðstöð menntunar og skólaþjónustu upp á námskeið bæði sem stað- og fjarnámskeið og stuðning við að þróa skapandi leiðir til að virkja fjölbreytta menningu og tungumál í vinnu með börnum og ungu fólki. Áhersla er lögð á það sem sameinar okkur, viðurkenningu á fjölbreytileikanum sem ríkir í samfélaginu og skapandi tjáningu.
Viðfangsefni sem komið verður inn á:
Menningarhugtakið og það að stuðla að menningarhæfni meðal barna og ungmenna
Tungumálavitund allra nemenda (það einstaka við tungumál og það sem er sameiginlegt, tungumál sem auðlind).
Hagnýtar leiðir sem verða kynntar:
Menningarmót - kennsluferli til að virkja reynsluheima nemenda, stuðla að gagnvirkum skilningi og samkennd
Töfrakista tungumálanna. Nýtt námsefni frá Miðstöð menntunar og skólaþjónustu. Markmið þess er að vekja forvitni og áhuga nemenda á tungumálum og efla tungumálavitund þeirra.
Vinna með skapandi sjálfsmyndir
Hvar og hvenær:
Skólar og sveitarfélög geta skipulagt sérsniðin stað- eða fjarnámskeið skólaárið 2025 og á vorönn 2026 í samráði við Kristínu R. Vilhjálmsdóttur með því að senda tölvupóst á kristinvil@gmail.com
Auk þess verður boðið upp á eftirfarandi námskeið á TEAMS í vor:
Leikskólar: þriðjudagur 25. mars kl. 14.30 - 16.00
Grunnskólar: miðvikudagur 26. mars 2025 kl. 14.30 - 16.00
Framhaldsskólar: fimmtudagur 27. mars kl. 14.30 - 16.00
Umsjón: Kristín R. Vilhjálmsdóttir, sjálfstætt starfandi ráðgjafi og hugmyndasmiður verkefnisins Menningarmót í samvinnu við Miðstöð menntunar- og skólaþjónustu.