Heimsókn heilbrigðisráðherra á Heilbrigðisstofnun Suðurlands

Heimsóknin var afar gagnleg og bauð upp á tækifæri til að ræða ýmis brýn málefni sem snerta þjónustu, rekstur, áskoranir, þróun og framtíðarsýn HSU.

Þá var sérstaklega rætt um mikilvægi þess að tryggt fullnægjandi mönnun á öllum sviðum starfseminnar og brýnar úrbætur á húsnæðisþörf HSU. Einnig var fjallað um áskoranir sem stafa af auknum fjölda ferðamanna í umdæmi stofnunarinnar, sem leggur aukna ábyrgð á heilsugæslustöðvar HSU vegna vaxandi eftirspurnar eftir þjónustu.

Staldrað var við mikilvægi gæða- og þróunarverkefna stofnunarinnar. Þar ber helst að nefna nýsköpunarverkefni í heimahjúkrunar- og heimaspítalaþjónustu, sem miðar að því að gera hrumum, veikum og öldruðum sjúklingum kleift að dvelja lengur í heimahúsi. Fjarvöktun sjúklinga er stór þáttur í þessari þjónustu, þar sem sjúklingar framkvæma sjálfir mælingar með búnaði sem HSU útvegar. Upplýsingar úr mælingum berast til starfsfólks HSU sem fylgist með og grípur inn í ef þörf krefur. Heimaspítalaþjónustan veitir einnig þjónustu til frekari sjúklingahópa sem annars þyrftu að leggjast inn á sjúkrahús.

HSU þakkar heilbrigðisráðherra og fylgdarliði fyrir ánægjulega og fróðlega heimsókn og lítur fram á veginn til að halda áfram að þróa og bæta þjónustu sína í samræmi við stefnu stofnunarinnar um að efla lífsgæði skjólstæðinga.

Sjá einnig frétt á síðu Heilbrigðissráðuneytisins