Fjársýslan leitar fjártæknilausna

Áskorunin

Fjársýslan sinnir bókhaldsþjónustu fyrir um 150 A-hluta stofnanir og um 30 stærri stofnanir halda eigið bókhald. Samtals eru þessar stofnanir með um 1.400 – 1.500 viðskiptakort í rekstri.

Áskorun Fjársýslunnar er tvíþætt:

• Mikil handavinna fylgir uppgjöri viðskiptakorta og tafir á gagnaskilum skapa mikla álagspunkta á fjármálasviði Fjársýslunnar

• Ófullkomin gagnaskil skekkja yfirsýn innkaupagagna ríkisins

Í samstarfi við Fjártækniklasann óskar Fjársýslan eftir áheyrn fyrirtækja á fjártæknimarkaði á sérstökum kynningarfundi um áskorunina þar sem þörf Fjársýslunnar verður gerð skýr skil og fyrirtæki geta lagt fram fyrirspurnir í umræðu við fulltrúa Fjársýslunnar að kynningu lokinni.

Og hvað svo?

Í kjölfar kynningarfundarins mun Fjársýslan óska eftir tímabundnu samstarfi um prófanir fjártæknilausna sem teljast mæta þörfum stofnunarinnar. Samstarfið verður skilgreint sem liður í undirbúningi Fjársýslunnar að fyrirhuguðum innkaupum á nýsköpun í bókhaldsþjónustu ríkisins og innleiðingu lausna í fjármálastarfsemi A-hluta stofnana.