Áætlun um heilsuvernd og forvarnir

Neyðaráætlun lýsir ráðstöfunum vegna skyndihjálpar, slökkvistarfs og brottflutnings starfsfólks komi upp neyðartilvik. Hún þarf að vera í samræmi við eðli starfseminnar og stærð vinnustaðar. Í henni þurfa auk þess að vera upplýsingar um það starfsfólk sem hefur skilgreint hlutverk við framkvæmd neyðaráætlunarinnar, þjálfun þess og búnað. 

Atvinnurekandi skilgreinir hvaða starfsfólki hann felur framkvæmd ráðstafana.

Við gerð neyðaráætlunar þarf að huga að eftirfarandi:

• Komi upp bráð hætta á heilsutjóni eða vinnuslysum vegna loftmengunar, eitraðra, eldfimra eða hættulegra efna, fallhættu eða sprengihættu skal starfsemin stöðvuð eða starfsfólki gert að hverfa frá þeim stað þar sem hættuástand ríkir.

• Atvinnurekandi skal tryggja að starfsfólk geti sjálft gripið til viðeigandi ráðstafana ef öryggi þess eða annarra er stefnt í bráða hættu.

• Geymslustaðir sjúkrakassa þurfa að vera vel merktir og þeir yfirfarnir reglulega.

• Sjúkrakassar eiga að vera aðgengilegir starfsfólki og annar búnaður til fyrstu hjálpar í dæmigerðum slysum út frá eðli starfseminnar.

• Atvinnurekandi skal upplýsa alla hlutaðeigandi um hver áhættan er og til hvaða aðgerða hefur verið gripið eða á að grípa til í verndarskyni.