Stofnun ársins er samstarfsverkefni Sameykis, fjármála- og efnahagsráðuneytisins, Reykjavíkurborgar og fjölmargrar annarra stofnana. Niðurstöður veita upplýsingar um vinnuumhverfi og samanburð við aðrar stofnanir. Tilgangurinn er að veita þeim vinnustöðum viðurkenningu sem náð hafa framúrskarandi árangri við stjórnun mannauðs og einnig að gefa stjórnendum tækifæri til að vinna að frekari umbótum í stjórnun og vinnuumhverfi vinnustaða segir á vefsíðu Sameykis. 

„Það  er okkur mikill heiður að fá þessa viðurkenningu. Hún skiptir okkur miklu máli í ljósi þess að við viljum vera góð fyrirmynd þar sem störf okkar felast í því að hvetja vinnustaði landsins til að stuðla að öryggi og vellíðan starfsfólks,“ segir Hanna Sigríður Gunnsteinsdóttir, forstjóri.  

"Við vitum að heilbrigð vinnustaðamenning leggur grunn að öryggi og vellíðan starfsfólks og hefur jákvæð áhrif á árangur og orðspor vinnustaða. Við sem vinnum saman hjá Vinnueftirlitinu höfum öll lagt okkar lóð á vogaskálarnar til að ná þessum frábæra árangri. Lykillinn er að við erum öll þátttakendur í þessari mikilvægu vegferð okkar og berum öll ábyrgð. Við erum til staðar fyrir hvert annað, tileinkum okkur jákvæð viðhorf og uppbyggilega endurgjöf." 

Vinnueftirlitið óskar öðrum fyrirmyndarstofnunum 2024 innilega til hamingju en nánari upplýsingar um niðurstöður könnunarinnar má finna á vefsíðu Sameykis.