Hlutverk, verkefni og ábyrgð persónuverndarfulltrúa
Eftirlit með reglufylgni
Hlutverk persónuverndarfulltrúa er meðal annars að aðstoða fyrirtæki við að sinna innra eftirliti, upplýsa og ráðleggja vegna persónuverndarlöggjafarinnar, veita ráðgjöf við framkvæmd mats á áhrifum á persónuvernd ásamt því að vera tengiliður við einstaklinga og Persónuvernd.
Til að sinna eftirliti með reglufylgni og aðstoða ábyrgðaraðila og vinnsluaðila við að fylgja persónuverndarreglugerðinni þarf persónuverndarfulltrúinn sérstaklega að:
safna upplýsingum til að greina vinnsluna,
greina og fylgjast með reglufylgni í starfseminni,
upplýsa, ráðleggja og koma á framfæri tillögum til ábyrgðaraðila eða vinnsluaðila.
Ábyrgð persónuverndarfulltrúa
Það er á ábyrgð fyrirtækisins eða stjórnvaldsins að tryggja og geta sýnt fram á að vinnsla persónuupplýsinga hjá þeim sé í samræmi við reglurnar („ábyrgðarskyldan“).
Persónuverndarfulltrúinn er ekki persónulega ábyrgur ef ákvæðum persónuverndarlöggjafarinnar er ekki fylgt. Hann getur hins vegar borið refsiábyrgð gerist hann sekur um alvarleg brot á þagnarskyldu.
