Handbókin er sett upp á aðgengilegan og hagnýtan máta, til dæmis eru aðalatriði tekin saman á eina opnu þar sem í stuttu máli er fjallað um það sem mælt er með og hvað forðast ætti þegar fjallað er um sjálfsvíg.

Í íslensku útgáfunni eru sérstakir íslenskir viðaukar, til dæmis tillögur að texta til að láta fylgja með umfjöllunum um sjálfsvíg, tillögur að orðalagi á íslensku, listi yfir stuðningsúrræði, ítarefni og fleira. Handbókin getur því nýst fjölmiðlafólki í störfum sínum en einnig er ráðgert að efnið sé kynnt í grunnnámi í blaðamennsku.

Í tilefni af útgáfu ráðlegginganna, snemma í febrúar, var fulltrúum fjölmiðla boðið til kynningarfundar í húsakynnum embættis landlæknis. Síðan þá hafa verið kynningar á efninu fyrir þá fjölmiðla sem þess hafa óskað. Bæði kynningar þar sem fulltrúi Lífsbrúar mætir á staðinn en einnig er hægt að fá rafræna kynningu sem hentar þá sérstaklega vel fyrir landsbyggðarfjölmiðla.

Ráðleggingar fyrir fjölmiðlafólk verða einungis gefnar út á rafrænu formi á vefsíðu embættis landlæknis og á vef Blaðamannafélags Íslands.

Fyrirspurnir um nýju ráðleggingarnar má senda á lifsbru@landlaeknir.is. Óskir um kynningu á ráðleggingum má senda á sama netfangi.

Frekari upplýsingar
Guðrún Jóna Guðlaugsdóttir, verkefnastjóri sjálfsvígsforvarna hjá Lífsbrú - miðstöð sjálfsvígsforvarna