Embætti landlæknis og Sjúkratryggingar Íslands fengu árið 2019 það verkefni að annast formlegt eftirlit með því að heilsugæslustöðvar starfi í samræmi við gildandi kröfulýsingu vegna rekstrar heilsugæsluþjónustu og uppfylli öll skilyrði sem þar eru tilgreind. Eftirlitið mun m.a. felast í greiningu og rýni starfsemistalna, kostnaðar- og þarfavísitala, gæðaviðmiða og eftirliti með skráningu sjúkdómsgreininga sem eru undirstaða þarfavísitölu. Samkvæmt skipunarbréfi er embætti landlæknis einnig ætlað að móta og samræma skýrara verklag við skráningar sjúkdómsgreininga í heilsugæslu þar sem skráðar sjúkdómsgreiningar eru undirstaða útreikninga á sjúkdómabyrði í fjármögnunarkerfi heilsugæslu.

Skráning sjúkdómsgreininga í sjúkraskrá - Leiðbeiningar eru meðfylgjandi. 

Leiðbeiningarnar byggja á fyrirmælum í lögum og reglugerð um sjúkraskrár, fyrirmælum landlæknis um öryggi og gæði sjúkraskráa sem og fyrirmælum landlæknis um lágmarksskráningu.

Leitað var til sérfræðinga í heimilislækningum, stjórnenda í heilsugæslu auk sérfræðinga í sjúkraskrárkerfinu Sögu við vinnuna og eru þeim færðar bestu þakkir fyrir gagnlegar athugasemdir.

Áslaug Salka Grétarsdóttir, verkefnisstjóri, heilbrigðisupplýsingasviði
netfang: salka(hja)landlaeknir.is