Suðurnesjabær varð formlega aðili að Heilsueflandi samfélagi (HSAM) þann 14. janúar sl. þegar Magnús Stefánsson bæjarstjóri og Alma D. Möller landlæknir undirrituðu samning þess efnis í hátíðarsal Gerðaskóla. Athöfnin var haldin í tengslum við útnefningu íþróttamanns Suðurnesjabæjar. Viðstaddir voru m.a. bæjarfulltrúar, fremsta íþróttafólk bæjarins, ungt tónlistarfólk sem spilaði og söng fyrir gesti og fjölmargir aðrir íbúar á öllum aldri. Í ágúst síðastliðnum var undirrituð viljayfirlýsing um HSAM á Suðurnesjum, sú fyrsta sinna tegundar.

Meginmarkmið Heilsueflandi samfélags er að styðja samfélög í að vinna með markvissum hætti að því að skapa umhverfi og aðstæður sem stuðla að heilbrigðum lifnaðarháttum, heilsu og vellíðan allra íbúa. Í slíku samfélagi er heilsa og líðan íbúa í fyrirrúmi í stefnumótun og aðgerðum á öllum sviðum. Með innleiðingu Heilsueflandi samfélags vinna sveitarfélög einnig m.a. að innleiðingu heimsmarkmiða Sameinuðu þjóðanna.

Suðurnesjabær er 30. sveitarfélagið sem gerist Heilsueflandi samfélag og búa nú um 92% landsmanna í slíku samfélagi.

Nánar:

• Heilsueflandi samfélag

• Heimsmarkmið Sameinuðu þjóðanna

Gígja Gunnarsdóttir, verkefnastjóri Heilsueflandi samfélags