Mýrdalshreppur varð formlega aðili að Heilsueflandi samfélagi (HSAM) þann 8. október sl. þegar Þorbjörg Gísladóttir sveitarstjóri og Dóra Guðrún Guðmundsdóttir sviðsstjóri lýðheilsusviðs hjá embætti landlæknis undirrituðu samning þess efnis í íþróttamiðstöðinni í Vík.

Viðburðurinn fór fram í tengslum við árlega menningarhátíð Mýrdælinga, Regnboginn – list í fögru umhverfi. Viðstaddir voru íbúar á öllum aldri, fulltrúar sveitarstjórnar, starfsfólk sveitarfélagsins og nemendur frá leikskólanum Mánalandi og Víkurskóla en báðir þessir skólar eru Heilsueflandi skólar. Rúmlega 40% íbúa sveitarfélagsins eru af erlendum uppruna og endurspeglaðist það á skemmtilegan hátt í tengslum við þennan viðburð sem og aðra viðburði á menningarhátíðinni. Samhliða undirskriftinni var vígður glæsilegur klifurveggur í íþróttamiðstöðinni. Mótvægisstyrkur vegna COVID-19 faraldursins nýttist til efniskaupa en sjálfboðaliðar sáu um hönnun og uppsetningu veggsins.  

Meginmarkmið Heilsueflandi samfélags er að styðja samfélög í að vinna með markvissum hætti að því að skapa umhverfi og aðstæður sem stuðla að heilbrigðum lifnaðarháttum, heilsu og vellíðan allra íbúa. Í slíku samfélagi er heilsa og líðan íbúa í fyrirrúmi í stefnumótun og aðgerðum á öllum sviðum. Starf Heilsueflandi leik-, grunn- og framhaldsskóla, Heilsueflandi vinnustaða og heilsuefling eldri borgara er mikilvægur liður í starfi Heilsueflandi samfélags. Með innleiðingu Heilsueflandi samfélags vinna sveitarfélög meðal annars að innleiðingu heimsmarkmiða Sameinuðu þjóðanna.

Mýrdalshreppur er 36. sveitarfélagið sem gerist Heilsueflandi samfélag og búa nú um 93,8% landsmanna í slíku samfélagi.

Nánar um Heilsueflandi samfélag

Nánar um lýðheilsuvísa

Nánar um heimsmarkmið Sameinuðu þjóðanna

Gígja Gunnarsdóttir

verkefnastjóri Heilsueflandi samfélags