Þjónustu- og viðgerðarsaga bíla og persónuvernd
Upplýsingar um þjónustu- og viðgerðarsögu bifreiða geta talist persónuupplýsingar
Skilyrði þess að persónuverndarlögin gildi er að vinnsla persónuupplýsinga hafi átt sér stað.
Bifreiðar eru skráðar í ökutækjaskrá sem Samgöngustofa annast. Í ökutækjaskrá eru meðal annars færðar upplýsingar um ökutæki, eiganda þess og eftir atvikum umráðamann.
Verk unnin á skráðum bifreiðum fylgja því umræddu ökutækjanúmeri og geta með því móti verið persónugreinanlegar upplýsingar.
Afhending upplýsinga um þjónustu- og viðgerðarsögu bifreiðar til nýs bifreiðaeiganda
Öll vinnsla persónuupplýsinga, svo sem miðlun þeirra frá Samgöngustofu, tryggingafélögum, bifreiðaumboðum eða verkstæðum, þarf að fara fram á grundvelli heimildar í persónuverndarlögum.
Sjá hér um heimildir til að vinna með persónuupplýsingar.
Sú heimild sem hér gæti einkum komið til skoðunar er sú að vinnslan sé heimil á grundvelli þess að hún teljist nauðsynleg vegna lögmætra hagsmuna sem ábyrgðaraðili (til dæmis þjónustuverkstæði eða bifreiðaumboð) eða þriðji maður (til dæmis nýr eigandi bifreiðar) gætir.
Það er á ábyrgð ábyrgðaraðila (það er, þess sem miðlar upplýsingunum) að meta hvort og þá hvaða heimild til miðlunarinnar er til staðar, og þar með hvort nýjum bifreiðareiganda er unnt að óska eftir viðgerðar- og þjónustusögu bíls, en það mat getur sætt endurskoðun Persónuverndar, berist stofnuninni formleg kvörtun.
