Fjöldi hlýddi á erindi um innihald stafrænna deiliskipulagsgagna og hvernig innleiðingu þess verður háttað á komandi mánuðum, á upplýsingafundi um stafrænt deiliskipulag sem haldinn var þann 13. febrúar sl. Fundurinn fór fram í húsakynnum Skipulagsstofnunar og sátu þátttakendur ýmist í sal eða tóku þátt gegnum fjarfund. Góðar umræður sköpuðust í lok fundar. Þakkar Skipulagsstofnun þeim sem á hlýddu og tóku þátt í umræðum.

Innihald gagna og innleiðing næstu mánuði

Fundurinn er liður í kynningu stofnunarinnar á breyttu verklagi við gerð deiliskipulagsgagna en samkvæmt skipulagslögum á að vinna skipulag á stafrænu formi og skila þannig til Skipulagsstofnunar. Felur það í sér að vinna skipulagshönnuða færist að einhverju leyti úr hefðbundnum teiknikerfum yfir í landupplýsingakerfi.

Á fundinum kom meðal annars fram að farið verði fram á stafræn skil fyrir nýtt deiliskipulag frá 1. júní næstkomandi. Eftir þann tíma þarf að skila inn stafrænum gögnum fyrir verulegar og óverulegar breytingar á skipulagið sem til er á stafrænu formi. Skipulagsstofnun getur þó tekið við stafrænu deiliskipulagi nú þegar og því ekkert því til fyrirstöðu að skila deiliskipulagi á stafrænu formi fyrir 1. júní.

Á síðu tileinkaðri landupplýsingum og stafrænu skipulagi er að finna gagnalýsingu og leiðbeiningar um gerð stafræns deiliskipulags auk sniðmáts sem nota má í landupplýsingaforritum. Til stendur að útbúa stutt kennslumyndbönd til að gefa dæmi um verklag og einnig er til skoðunar að halda námskeið um stafrænt skipulag.

Dagskrá fundar, upptaka og glærur frummælenda

• Upptaka af upplýsingafundi um stafrænt deiliskipulag

• Glærur frummælenda

Opnun fundar. Ólafur Árnason, forstjóri Skipulagsstofnunar.

Innihald stafræns deiliskipulags og yfirferð gagna. Albert Þorbergsson.

Innleiðing stafræns deiliskipulags. Guðrún Lára Sveinsdóttir.