Stjórn dómstólasýslunnar hefur samþykkt nýjar reglur um form, afhendingarmáta og staðfestingu skjala í dómsmálum nr. 1662/2024 sem tóku gildi 1. janúar sl.

Í reglunum er mælt fyrir um það með hvaða hætti skjöl skuli berast hverju og einu dómstigi. Aukin áhersla er lögð á að skjöl berist dómstólum með rafrænum hætti. Dómstólasýslunni er falið að taka ákvörðun um það í hvaða kærðu sakamálum skjöl skuli berast Landsrétti í gegnum réttarvörslugátt og í hvaða ákærumálum skjöl skuli berast héraðsdómstólum með sama hætti. Ekki er gerð krafa um að skjöl sem berast dómstólum í gegnum réttarvörslugátt séu jafnframt lögð fram á pappír.

Á grundvelli reglnanna hefur stjórn dómstólasýslunnar tekið ákvörðun um að öll skjöl í kærðum sakamálum þar sem krafist er endurskoðunar úrskurða í rannsóknarmálum samkvæmt 1. mgr. 102. gr. laga nr. 88/2008 um meðferð sakamála skuli berast Landsrétti í gegnum réttarvörslugátt. Einnig skulu öll skjöl í ákærumálum sem eingöngu lúta að umferðalagabrotum berast héraðsdómstólum í gegnum réttarvörslugátt. Ákvörðun þessi verður svo endurskoðuð eftir því sem þróun réttarvörslugáttarinnar fleygir fram og hægt verður að taka við fleiri málategundum þar í gegn.

Um áramótin tóku jafnframt gildi nýjar reglur um málsvarnarlaun eða þóknun til verjenda og þóknun til réttargæslumanna o.fl nr. 1/2025 og reglur um sérfróða meðdómsmenn nr. 2/2025. Breytingarnar á þessum reglum lutu eingöngu að fjárhæð þóknunar. Auk þess voru gerðar breytingar á reglum um útgáfu dagskrár héraðsdómstólanna sem fólu í sér að gildistöku 2. og 3. mgr. 3. gr. um birtingu upplýsinga um tegund máls var frestað til 1. júlí 2025.